யாத்ரா

நடுநிசி

பலன் பார்க்கும் பழக்கமுண்டாவென

தலையில் விழும் பல்லி

பூனையின் இருப்பை

பரிசோதித்துச் செல்லும் எலி

புணர்ச்சி நிமித்தம்

அலையும் நாய்கள்

உறக்கம் தொலைத்த இரவில்

இன்னும் என்னவெல்லாமோ நடந்தது

அப்பா

அம்மாவின் புருஷன்

இத்தனை காலமாய்

இதுகூட

தெரியாமலிருந்திருக்கிறது.

கண்டராதித்தன்

புகைப்படத்தில் புறாவின் முட்டையைத் திருடுபவன்

ஒரு புறாவின் முட்டையை நான்

திருடிக்கொண்டிருப்பது போன்ற

புகைப்படம் இன்று அஞ்சலில் வந்தது

பரிதாபமான எனது கண்கள்

அப்போது முட்டையைப் பார்த்துக்

கொண்டிருக்கவில்லை.

புறாவின் முட்டையை வைத்து

ஆகவேண்டிய காரியம் ஏதும்

எனக்கிருக்கவில்லை

முட்டையைத் திருடுவது போல

நடித்துக்காட்டும் புகைப்படமென்றும் கூட

யாரும் எடுத்துக்கொள்ளப் போவதில்லை

கெட்ட எண்ணத்தோடு அனுப்பப்பட்டிருக்கும்

இந்தப் புகைப்படத்தால் புறாக்களையோ

என்னையோ விரும்பாத ஒருவனை

யூகிக்கமுடிகிறது

எனக்கும் புறாவிற்கும்

யாதொரு தொடர்பும் இல்லையென்பதை

விரும்பாத அந்த ஒருவனை

இப்போது அலட்சியப்படுத்துகிறேன்

நிச்சயம் இது தெளிவாக்கப்பட

வேண்டிய விசயம்

எங்கும் அலைந்து திரியும்

புறாவொன்றை நிறுத்தி

நிச்சயம் நான் ஒரு புறாவின்

முட்டையைத் திருடுவது போன்ற

இந்தப் புகைப்படத்தைக் காட்டி

சொல்லத் தொடங்கினேன்

எந்த சூழ்நிலையிலும்

உங்களுக்கோ

உங்களின் முட்டைகளுக்கோ…